ಸಂಕಲ್ಪ ಗೀತೆ ನೋಟ್ಸ್ 10ನೇ ತರಗತಿ | Sankalpa Geethe Kannada Notes Question Answer

ರಾಷ್ಟ್ರಕವಿಗಳಾಗಿದ್ದ ಡಾ | ಜಿ.ಎಸ್ . ಶಿವರುದ್ರಪ್ಪನವರು ಸಂಕಲ್ಪದ ಮಹತ್ವವನ್ನು ತಿಳಿಸಿದ್ದಾರೆ . ನಾವು ಜೀವನದಲ್ಲಿ ಯಾವಾಗಲೂ ಧನಾತ್ಮಕ ಭಾವನೆಯನ್ನು ರೂಢಿಸಿಕೊಳ್ಳಬೇಕು . ದೃಢ ಸಂಕಲ್ಪವನ್ನು ಹೊಂದಿರಬೇಕು .

ಯಾವುದೇ ರೀತಿಯ ಸವಾಲುಗಳು ನಮ್ಮ ಜೀವನದಲ್ಲಿ ಎದುರಾದರೂ ಆತ್ಮವಿಶ್ವಾಸದ ಸಂಕಲ್ಪ ನಿಷ್ಠೆಯಿಂದ ಕ್ರಿಯಾಶೀಲರಾಗಬೇಕು . ಆಗ ನಮಗೆ ಯಶಸ್ಸು ಲಭಿಸುತ್ತದೆ . ಭೇದಭಾವಗಳನ್ನು ಹೋಗಲಾಡಿಸಿ ಏಕತೆಯಿಂದ ಪ್ರಯತ್ನ ಶೀಲರಾಗಬೇಕು . ಆಗ ನಮ್ಮ ಬಲ , ಶಕ್ತಿ , ವೃದ್ಧಿಸುತ್ತದೆ . ವರ್ಧಿಸುತ್ತದೆ . ಈ ಸಮಾಜವು ಭಯ ಮತ್ತು ಅನುಮಾನಗಳಿಂದ ಆವರಿಸಲ್ಪಟ್ಟಿದೆ .

ಇಂಥ ಸಮಾಜವನ್ನು ದೃಢನಿಷ್ಠೆಯಿಂದ ಸದೃಢಗೊಳಿಸಬೇಕಾಗಿದೆ . ಸ್ವಾಸ್ಥ್ಯದ ನೆಲೆಯಾಗಿಸುವ ಹಣತೆಯನ್ನು ಹಚ್ಚಿ ಅಜ್ಞಾನವೆಂಬ ಕತ್ತಲೆಯನ್ನು ದೂರವಾಗಿಸೋಣ ಎಂದು ಡಾ || ಜಿ.ಎಸ್ . ಶಿವರುದ್ರಪ್ಪರವರು ತಿಳಿಸಿದ್ದಾರೆ .

ನಮ್ಮ ಸುತ್ತ ಮುತ್ತಲೂ ಕವಿದಿರುವ ಅಜ್ಞಾನವೆಂಬ ಕತ್ತಲೆಯನ್ನು ಕಳೆಯುವುದಕ್ಕಾಗಿ , ಅಂಧಕಾರವನ್ನು ಹೋಗಲಾಡಿಸುವುದಕ್ಕಾಗಿ ಪ್ರೀತಿಯ ಹಣತೆಯನ್ನು ಜ್ಞಾನದ ಜ್ಯೋತಿಯನ್ನು ಹಚ್ಚಣ , ಬಿರುಗಾಳಿಯಿಂದಾಗಿ ಹೊಯ್ದಾಡುತ್ತಿರುವ , ಹಡಗನ್ನು ಎಚ್ಚರದಿಂದ ಮುನ್ನಡೆಸೋಣ . ಪರಿಸರವು ನಿರಂತರವಾಗಿ ಮಲಿನಗೊಳ್ಳುತ್ತಿದೆ .

ಸಮಾಜವೂ ಭ್ರಷ್ಟವಾಗುತ್ತಿದೆ . ನದೀ ನೀರು ಕಲುಷಿತಗೊಂಡು ಜಲಚರ ಜೀವಿಗಳಿಗೆ ಮಾರಕವಾಗುತ್ತಿದೆ . ಅಂಥ ಮಲಿನವಾದ ನದಿಯನ್ನು ಶುದ್ದೀಕರಿಸುವುದಕ್ಕಾಗಿ ನಾವು ಮುಂಗಾರಿನ ಮಳೆಯಾಗೋಣ . ಕಟ್ಟುವುದು ಕಠಿಣ ಕೆಡಹುವುದು ಸುಲಭ , ಸಮಾಜದಲ್ಲಿ ಅನೇಕರು ಅಧಃಪತನಕ್ಕೆ ಹೋಗುತ್ತಿದ್ದಾರೆ . ಆತ್ಮವಿಶ್ವಾಸ ಕಳೆದುಕೊಳ್ಳುತ್ತಿದ್ದಾರೆ . ಮಾನಸಿಕವಾಗಿ ಕುಗ್ಗುತ್ತಿದ್ದಾರೆ .

ಭಯಭೀತರಾಗಿದ್ದಾರೆ . ಅಂಥವರ ಬಾಳಿನಲ್ಲಿ ಭರವಸೆಗಳನ್ನು ಮೂಡಿಸೋಣ , ಪ್ರತಿಯೊಂದು ಮತವೂ ಅಂದರೆ ಅಭಿಪ್ರಾಯವು ಬೇರೆಯದೇ ಆದ ಮಾರ್ಗ , ದಾರಿ ಎಂಬುದನ್ನು ಅರಿಯಬೇಕಾಗಿದೆ , ಉಡುಗೆ , ತೊಡುಗೆ ಆಚಾರ – ವಿಚಾರ , ಆಹಾರ – ವಿಹಾರ , ಜಾತಿ – ಮತ , ವೇಶ – ಭಾಷೆ ಬೇರೆಯಾದರೂ ಭಾವನೆ ಒಂದೇ ಎಂಬ ವಿಚಾರವನ್ನು ಬಿತ್ತಿ ಬದುಕಬೇಕಾಗಿದೆ . ಹೀಗೆ ಕವಿ ಶಿವರುದ್ರಪ್ಪನವರು ಸಂಕಲ್ಪ ಮತ್ತು ಅನುಷ್ಠಾನದ ಕುರಿತು ತಮ್ಮ ಅಭಿಪ್ರಾಯವನ್ನು ತಿಳಿಸಿದ್ದಾರೆ .